Mae Gareth Roberts
yn drombonydd sydd wedi bod yn chwarae Jazz o gwmpas ardal Caerdydd
a De Cymru ers sawl blwyddyn. Mae'n
chwarae mewn amryw o fandiau Cymreig (gweler bandiau) yn cynnwys
Cerddorfa Cyfansoddwyr Jazz Cymru a phumawd Jazz wedi ei ffurfio
a’i redeg ganddo ef ei hun a byddant yn chwarae nifer o’i
gyfansoddiadau ef.
Cafodd ei brofiadau
cerddorol cynnar Gareth yn Aberystwyth fel chwaraewr Iwffoniwm
mewn Bandiau Prês. Yn hwyrach newidodd i chwarae'r
trombôn ar ôl iddo benderfynu ei fod am chwarae Jazz
a sylweddolodd na fyddai’r Jazz a chwareir ar yr Iwffoniwn
byth yn profi i fod yn or-boblogaidd.
Ar ôl gadael Ysgol Gyfun Penweddig aeth Gareth i Brifysgol Nottingham i
astudio Peirianneg Sifil ac ar ôl iddo dreulio 3 blynedd yn dysgu popeth
oedd i’w ddysgu am goncrît a dulliau weldio dychwelodd i Aberystwyth
i ddilyn cwrs Ymarfer Dysgu Mathemateg.
Symudodd Gareth i Gaerdydd ym 1998 ac am bum mlynedd fe weithiodd fel athro llawn
amser yn Ysgol Gyfun Rhydywaun cyn i ormod o nosweithiau hwyr ar y sîn
jazz ei orfodi i adael er mwyn dilyn cwrs Ôl-Raddedig Jazz yng Ngholeg
Cerdd a Drama Cymru.
Astudiodd Gareth gyda Paula Gardiner a Keith Tippett a sawl cerddor jazz adnabyddus
arall ac fe gafodd wersi trombôn gan Mark Bassey yng Ngholeg Trinity, Llundain.
Mae Gareth yn brysur iawn fel trombonydd ac yn ogystal â chwarae gyda nifer
fawr o fandiau y mae hefyd yn debyn gwaith rheolaidd yn chwarae ar y teledu a´r
radio. Yn ddiweddar perfformiodd ar ddrama a ennillodd wobr ar Radio 3.
Yn ogystal â gweithio'n broffesiynol fel trombonydd mae Gareth hefyd
yn brysur iawn yn gweithio yn y byd addysg cerddoriaeth. Y mae'n dysgu’n
rhan amser yn Ysgol Gyfun Glantaf, mae´n arwain a chyfansoddi cerddoriaeth
ar gyfer dau fand jazz disgyblion ysgol ac fe’i cyflogir gan sawl mudiad
gwahanol i redeg gweithdai cerdd ar gyfer disgyblion o bob oed (gweler dysgu
/ gweithdai).
Mae Gareth newydd ryddau ei CD cyntaf a elwir yn “The Attack of the Killer
Penguins”. Mae´r CD ar gael i brynu oddi ar y wefan hon. Yn ogystal â’i
brynu, mae'n bosib gwrando ar sawl cân wrth wylio gwaith celf trawiadol
Rhys Bevan Jones. (Gweler Killer Penguins).
Dylanwadau
Cerddorol
Mae Gareth
yn rhestru sawl cerddor sydd wedi cael dylanwad ar ei ysgrifennu
a'i
chwarae:
“Y cyfansoddwr sydd wedi dylanwadu fwyaf arna i yw Charles
Mingus, mae'r cydbwysedd y mae'n llwyddo i’w
gael rhwng yr ysgrifennu a'r byrfyfyrio yn berffaith ac
wedi bod yn rhywbeth rydw i wedi anelu i’w gopio yn fy
nghyfansoddiadau fy hun. Rydw i hefyd wedi cael fy nylanwadu'n
gryf gan gyfasoddwyr yr oes Blue Note fel Horace Silver sydd
yn fy marn i yn un o'r
cyfansoddwr jazz gorau erioed i grwpiau bach. Yn ddiweddar rydw
i wedi cymryd diddordeb mewn rhai o'r dulliau rhythmig
o gyfansoddi a ddefnyddir gan Dave Holland yn ogystal a chyfansoddwyr
eraill.
“Fel chwaraewr trombôn mae’n rhaid i mi ddweud
mai'r
ddau chwaraewr sydd wedi cael y dalanwad mwyaf ar fy steil o
chwarae yw Jimmy Knepper a Gary Valente. Yn fy marn i mae'r ddau
chwaraewr yma´n chwarae'r trombôn yn y ffordd
y dylai'r trombôn gael ei chwarae. Maen nhw´n
defnyddio cryfderau´r offeryn. Ar ôl i mi glywed
Gary Valente yn chwarae unawd ar un o recordiau Andy Sheppard
y penderfynais
newid o chwarae'r iwffoniwm i’r trombôn yn
y lle cyntaf.”
Clocwedd, yn
dechrau o'r chwith; Lluniau o Charles Mingus, Jimmy Knepper,
Albwm Andy Sheppard "Soft on the inside & Gary Valente.
